ЭгIаштахь даздарш дIадаьхьира

Кху деношкахь Шела кIоштан ЭгIашта йуьртахь боккхачу айамца дIадаьхьира Даймохк ларбархочун Де. Меттигера синоьздангаллин Кхерчан белхахой дика кечбеллера оцу хиламна. Цуьнан сени чоьхьа ма-веллинехь хаалора дезчу дийнан хIуо: Даймохк ларбархойн суьрташ, леррина кечбина киншкийн гайтам, кхидерг.

Билгалйинчу хенахь схьакхечира хьеший. Царна йукъахь – тIаьхьарчу 30-40 шарахь хиллачу тIемийн дакъалацархой: нохчийн «овганхоша» тIера –хIинца Украинехь дIахьочу лерринчу тIеман операцин (СВО) бIаьхой а цхьаьна.

Уьш массо а маршаллица тIеоьцура региональни Кадыров Ахьмад-Хьаьжин цIарахчу ТIеман гIуллакхийн патриотийн Клубан куьйгалхочо Новрзукаев ИбрахIима а, йуьртан культурин ЦIийнан директора Сулаева Маликас а, йуьртан къанойн Кхеташонан председатела Новрзукаев Iадлан-Хьаьжас а.

РФ-н а, НР-н пачхьалкхан гимнаш лакхарца дIадолало даздарш. Меттигерчу дешархоша нохчийн а, оьрсийн а меттанашкахь дIайоьшу патриотически байташ. ТIаьхьарчарна тIехь даьхна вайн махкахь девзаш долу иллеш а, эшарш а йу.

Дешархоша НоврзукаевгIар – вежарша Наибис, Мусас дIайешна байташ а, Совнукаева Раянас, Магомадова Раянас, Новрзукаева Iайшата, Абдулазимова Амната, кхечара дIааьлла патриотически эшарш дехха тIараш деттарца тIеийцира гулбелчара. Ткъа цхьана хьешо-м, хиллачу «овганхочо», вевзаш волчу тележурналиста Зурушев Лом-Iелас шена йелла мидал дIайелира дика хелхар дарна жимчу эгIаштахочунна Новрзукаев Мусана.

— ХIинца сан жимчу йуьртахочун а ду тIеман совгIат, — элира Шелан муниципальни кIоштан администрацин куьйгалхочун гIовса Рашитов Руслана.

Концертан дакъа чекхдаьлча дIадолало тIемалой декъалбар. Ала догIу, ЭгIаштахь даим хилла бакъболу Даймохк ларбархой. Цара шайн турпалалла гайтина Сийлахь-боккхачу Даймехкан тIамехь, Овганан махкахь, Нохчийчохь тIемаш болчу хенахь.

Кху муьрехь Украинехь дIахьочу лерринчу тIеман операцехь дакъалаьцна кхузарчу 13 жимстага. Цига баха кийча бу кхин а иттанаш эгIаштахой.

Шелан а, Курчалойн а кIоштийн, Аргун-гIалин тIеман комиссариатан куьйгалхочун гIовса Бизаев Хасмохьмадий, лакхахь хьахийначу Зурушев Лом-Iелассий НР-н военкоман цIарах дIакховдайо къоначу эгIаштахошна сийлаллин мидалш. Царна юкъахь бу – Бачаев Солса, Налаев Iимран, Эрзанукаев Рустам, Рашитов Аслан, Хураев Ахьма.

Иштта къаьсттинчу совгIатца – «Овганан седа» цIе йолчу орденца билгалваьккхира хилла бIаьхо-интернационалист, Шела кIоштан РОВД-н хьаькаман гIовс полицин подполковник Седиев Герман.

И дагахь лаьттар йолу суьйре дIайирзира «хIусамнанас» – Сулаева Маликас кечбинчу нохчийн къоман кхачанах кхетарца. Дала сагIа дойла аш лелийнарг.

И. МАТАГОВ.